Għaliex għandna bżonn sistema ta’ mobbiltà sostenibbli?

It-trasport jgħaqqad lin-nies, il-kultura, il-bliet, il-pajjiżi u l-kontinenti. Huwa wieħed mill-pilastri ewlenin tas-soċjetajiet u l-ekonomiji moderni. Madankollu, il-mudell tat-trasport attwali tagħna qed jikkawża impatti negattivi fuq l-ambjent u s-saħħa tal-bniedem.

It-trasport jirrappreżenta madwar kwart tal-emissjonijiet ta’ gassijiet serra tal-UE u jikkawża t-tniġġis tal-arja, it-tniġġis akustiku u l-frammentazzjoni tal-ħabitats. Għalhekk, il-mixja lejn mobbiltà aktar sostenibbli hija ta’ importanza kbira. Dan ifisser li l-utenti jitqiegħdu l-ewwel u jiġu pprovduti b’alternattivi aktar affordabbli, aċċessibbli, aktar tajbin għas-saħħa u aktar nodfa.

L-Ewropa għandha l-għan li ssir newtrali għall-klima sal-2050 u dan ma jistax jinkiseb mingħajr sistema ta’ mobbiltà sostenibbli. Fl-2020, l-UE adottat strateġija ta’ mobbiltà sostenibbli u intelliġenti flimkien ma’ pjan ta’ azzjoni ta’ 82 inizjattiva mmirati lejn il-promozzjoni, pereżempju, tal-użu ta’ modi tat-trasport aktar sostenibbli. L-objettivi jinkludu ż-żieda fl-għadd ta’ passiġġieri li jivvjaġġaw bil-ferrovija, l-ivvjaġġar bit-trasport pubbliku u b’modi attivi, u t-trasport ta’ aktar merkanzija bil-ferrovija, bil-passaġġi fuq l-ilma interni u bit-trasport marittimu fuq distanzi qosra minflok bit-triq.

Għal aktar informazzjoni, jekk jogħġbok ara l-indikatur dwar “Use of collective transport modes for passenger transport and non-road transport modes for freight transport in Europe” (L-użu ta’ modi ta’ trasport kollettiv għat-trasport tal-passiġġieri u modi ta’ trasport mhux bit-triq għat-trasport tal-merkanzija fl-Ewropa) u l-paġna tematika tagħna dwar “Trasport u mobbiltà”.